‘O Napule ha cagnato faccia, de Sarri nun ce sta cchiù traccia

'A partita d'a mezza, o sole 'nfronte

coce e Ancelotti è 'mpazzuto:

vò jucà a ddoje ponte.

'O tifoso già ha chiagnuto:

"Ne pigliammo tre da 'o Torino,

'o campionato ormai è fernuto".

Dall'avvocato a 'o fattorino

a Napule teneno tutti 'o master

e chi è obiettivo è juventino.

Zero fiducia int'o mister

che magna pane e calcio

da quanno nuije eramo ancora 'nu mistero.

Friddo comme 'o ghiaccio

è addivintanto Insigne,

Ancelotti s'o tene sotto o' braccio.

Pure 'e difese cchiù arcigne

s'a vedeno nera

si 'o Napule 'e mille culure se tegne.

D'o 4-3-3 è fernuta l'era,

mo' pure quatto uommene 'mmiezzo 'o campo

e del bel gioco nun ce sta cchiù a fiera.

A Torino 'o vantaggio è 'nu lampo

e 'o raddoppio è 'nu gioello:

'a squadra 'e Mazzarri nun tene scampo.

Tanto di cappello

allo sperimentalismo di Ancelotti,

verticalizzare e finalizzare: che bello!

È ancora ampresso pe' sparà 'e botti,

'na distrazione 'e troppo

e va 'a fernì che segna Belotti.

Ma è solo 'nu piccolo intoppo,

pe' Sirigu dduje babà e 'na sfugliatella...

'A squadra azzurra se gode 'o malloppo.

L'ambizione è sempe chella:

ccà nun se dice, è 'na parolaccia

ma se spera sempe int'a 'na bona stella.

'O Napule ha cagnato faccia,

diceno che pare 'nu camaleonte

e de Sarri nun ce sta cchiù traccia.

Redazione - Armando Inneguale

©RIPRODUZIONE RISERVATA